“Ami halo ona levantamentu dadus no sukat no hatene duni katak sira ne’e nain ba rai duni, total ema ne’ebe maka simu sertifikadu ne’e hamutuk 124 iha aldeia Moris Foun, Suku Tali Moru, Distritu Ermera Sub-distritu Gleno,” dehan Diretor Terras Propriedade Distritu Ermera, Francisco Mouzinho, iha Gleno, (10/09).
Tuir nia, levantamentu dadus rai ne’e sei kontinua hodi bele identifika se los maka nain ba rai ne’e.
“Ami sei halo tan levantamentu dadus iha Suku Lau Ala no Aldeia Ri’heu , hodi nune’e bele rezolve problema rai ne’ebe maka durante ne’e sai preokupasaun ba povu tomak,” dehan Diretor Mouzinho.
Entretantu Ministru Justisa, Deonizio Babo hateten, entrega sertifikadu rai ba nain ba rai ne’e importante,nune’e ema ida-idak hatene sira nia rai.
“Durante ne’e ita sempre rona ema oho malu tan rai, tanba sira seidauk hatene los se maka nain ba rai lolos, ita espera katak iha Timor-Laran ne’e tomak dozentus mil parselas ne’e ita halo hotu iha tinan hirak mai, governu ida ne’e la halo hotu kontinua fali ba governu oin mai, hodi nune’e bele fo kepastian hukum,” dehan Ministru Babo.
