“Ita hare iha problema barak mak kauza husi joventude, ho ida ne’e ami koko atu muda joven sira liu husi perspektiva intelektual, signifika katak lideransa ida agora tenke prepara aan atu lori nasaun ne’e ba future ne’ebe diak no sai lideransa ne’ebe diak mos,” hateten Diretor RYTLA-TL, Eudisitio Pinto, (03/09), iha Salaun Retiru Dare, Dili.
Treinamentu durante semana ida ne’e, iha topiku 14 hanesan igualidade jeneru, politika, edukasaun, sosial no seluk tan ne’ebe sei fo ba partisipante sira.
Diretor ne’e dehan, RYTLA-TL hala’o programa ne’e hahu iha 2010 ho partisipante (joventude) hamutuk 50, iha 2011 iha ema nain 80 no agora iha 85 mak partisipa iha treinamentu ne’e.
“Joven sira ne’e balun hetan ona servisu iha Instituisaun Governu, Organizasaun Internasional no Nasional, sira barak liu mak hetan bolsu estudu husi governu no organizasaun sira,” Diretor ne’e katak.
Iha portunidade hanesan Prezidente Conselhu Nasional Joventude Timor-Leste (CNJTL), Leovigildo Hornai hateten, Timor-Leste nudar nasaun foun importante tebes atu prepara foinsa’e sira ho vizaun ne’ebe diak iha future.
“Hau hanoin politika CNJTL nian mak hamutuk ho governu no entidade hotu, ita bolu atensaun no fo konfiansa tomak ba doadores sira atu mai fo formasaun kapasitasaun iha area espesifiku ne’ebe sira presiza atu kontribui,” dehan Prezidente CNJTL ne’e.
Entretantu Jeneral Manajer Woodside iha Timor-Leste, Brendan Augustin sente kontente tanba sira nia programa la’o ho susesu no atinji duni doadores sira nia hakarak hodi investe iha sosiedade.
“Timor-Leste hanesan nasaun joven ida ne’ebe forte, buat hotu ami halo atu supporta nasaun joven ida ne’e iha area dezenvolve kapasitasaun, formasaun abilidade ba lideransa importante tebes ba joventude sira atu aprende sai lideransa ne’ebe diak ba sira nia an no ba sosiedade iha futuru,” dehan Jeneral Manajer Woodside ne’e.
Alende ne’e sira mos fo suporta ba setor agrikultura, saude, edukasaun inklui ba programa mal nutrisaun.
Programa kapasitasaun ba joventude sira ne’e hetan apoiu finanseira husi kompania Woodside, Conoco Phillips, Shell, Osaha Gas ho montante $ 41.000.
