“Bee ida iha ne’e loron kalan suli hela deit, ema mai kuru bee iha ne’eba, ita hare hela maibe ita sai matan delek hotu tiha deit,enkuantu iha Taibesi ne’eba ema hakilar ba bee,” kestiona Deputadu David Dias Ximenes , (25/08), iha Parlamentu Nasional.
Tuir nia, lolos ministeriu kompetente hare asuntu ida ne’e e oinsa mak bele resolve problema bee moos iha capital Dili.
Entretantu hatan ba kestaun ne’e Sekretariu Estadu Agua Saneamentu no Urbanizasaun (SEASU), Elias Pereira Moniz katak, sira nia ekipa ba hadia tiha ona maibe komunidade mak estraga fila fali bee tornera nian.
“Ami hadia dala walu ona e ami halo nia torneira sira kompletu maibe komunidade sira nia mental mak ladiak, ami halo tiha sobu fali,” dehan SE Moniz.
Sekretariu Estadu ne’e dehan, bee iha jardin ne’e la merese ba komunidade sira atyu konsumu, maibe ba fase roupa no sintina deit, tanba laiha kualidade.
Atu resolve problema ne’e, nia parte sei kordena ho Ministeriu Administrasaun Estatal no Administrador Distritu Dili atu hare kestaun ne’e.
“Hare to’ok se mak kontrola iha ne’eba,” SE Moniz tenik.
