Membrus Komisaun B Parlamentar mak sei halao fiskalizasaun kona ba implementasaun orsamentu do estado no mos aktividades ne’ebe halao kona ba sektor seguransa no defeza iha rai laran.
“Durante segundu lejislatura Prezidente Komisaun B mane mak domina, maibe agora dadaun ita komesa hare ona katak iha mudansa ona,” dehan Diretor Ezekutivu FM, Nelson Belo,(03/09), iha PN.
Tuir nia, ida ne’e tanba mane (Deputadus) sira iha Parlamentu Nasional komesa rekonese ona feto nia kapasidade no abilidade. “E iha komisaun ne’e iha deit feto nain tolu.”
Iha fatin hanesan Prezidente Komisaun B, Deputada Maria Lurdes Besa, rekonese katak iha mandatu II lejislatura feto la tama iha komisaun B, maibe ba mandatu ida ne’e feto mak sai prezidente komisaun.
“Hau sente ne’e nudar pasu bo’ot ida ba knar feto nian ne’ebe maka hola tan responsabilidade bo’ot iha area ida ne’ebe sensivel liu, maibe hau hanoin ne’e nudar sinal ida no tenke hatudu katak feto mos bele,” dehan Prezidente Komisaun B Parlamentar ne’e.
Nia dehan, nia ho nia membrus komisaun tomak sei halo fiskalizasaun ne’e rutina, liu-liu ba area defeza no seguransa, nune’e bele la’o diak liu tan.
“Ami iha komitmentu ida atu haforsa fiskalizasaun tanba area seguransa no defeza nudar asuntu nasionais, ne’e duni presiza duni atensaun,” Prezidente Komisaun B ne’e tenik.
