Atu kria Sentru Investigasaun Kriminal (SIK) iha Ministeriu Justisa nia laran, oras ne’e dadaun ekipa ne’ebe atu harii Sentru ne’e prontu ona
“Tekniku sira forma hotu ona, Formadores sira ne’ebe tuir formasaun iha Portugal fila hotu mai ona, agora sira tuir kursu nafatin iha ne’e, sira preparadu ona atu hari sentru ne’e,” hateten Ministru Justisa, Deonisio Babo, (30/08), iha Palasiu du Governu, Dili.
Agora dadaun Ministeriu sei koko koalia ho Institusaun hat atu define Sentru ne’e iha Institusaun ne’ebe nia okos.
“Agora sei diskuti hela, e iha tempu badak ne’e atu entegra ba institusaun sira hanesan Polisia, Tribunal ou Ministeriu Justisa nia okos ka iha Prokuradoria nia okos,” tenik Ministru Babo.
Entretantu Deputada Josefa Alvares Soares dehan, ne’e pasu positivu ida e espera katak ho harii sentru ne’e bele halo investigasaun ba krimi sira ne’ebe iha.
“Ne’e progresu ne’ebe maka diak ona, presiza duni buat sira ne’e atu halo kontinuasaun ba investigasaun ba krimi-krimi sira ne’ebe karik uluk la kobre hotu, bele halo investigasaun hotu,” Deputadu Soares esperansa.
Deputada ne’e sujere, Governu tenke tau ema ne’ebe maka professional, iha duni kapasidade iha sentru ne’e, tanba ne’e la’os buat ne’ebe maka fasil.
