“Matebian agora dadaun iha hela morturiu,” hateten Deputadu Jacinto Viegas, (03/09), iha PN.
Deputadu ne’e haktuir, Arguidu Mausoko iha 2006 nia oho ona nia maluk ida tanba problema rai no tama prizaun durante tinan 4, hafoin sai husi prizaun arguidu oho tan nia maluk rasik ho kazu ne’ebe hanesan mos.
Tanba ne’e Deputadu ne’e sujere atu aselera prosesu atu halo debate no aprova lalais lei rain nian ne’ebe to’o agora sei pendent hela.
“Se la’e bele akontese tan problema hanesan e liu tan ida ne’e tanba ema hotu hakarak iha rai,” tenik Deputadu ne’e.
Entretantu Kordenadora Rede ba Rai, Ines Martins hateten problema hanesan ne’e akontese dalabarak ona desde tempu Portugues to’o agora.
Tanba tuir nia, atu prevene labele mosu problema hadau malu rai entre komunidade sira, bainihra governu atu sukat rai komunidade sira nia tenke involve autoridade local sira.
“Presiza iha Xefe Suku sira, familia sira, vizinhu sira hodi deklara katak nain lolos maka ne’ebe no se maka la’os nain ba rai, no se nia nain, nia hakarak ninia direitu ne’e to’o iha ne’ebe atu nune’e ema ne’e mos bele klaru no presiza mos lei rai tenke diskute ou aprova ona,” dehan Koordenadora Martins.
Kordenadora ne’e mos husu ba Deputadu sira atu hare didiak lei rai nian ne’ebe sei pendent hela ne’e, liu-liu kona ba injustisa ne’ebe mak akontese iha tempu Portugues no Indonezia, nune’e bele iha kredibilidade no fo benefisiu ba ema hotu.
