Luta ba ukun rasik aan la’os buat ida ke fasil tanba ne’e atu istoria hirak ne’e labele lakon le’et deit, Xefe Estadu Taur Matan Ruak husik hela istoria ne’e liu husi hakerek livrus ‘A Vida Pela Independensia ka Moris Ba Ukun Rasik Aan’ atu jerasaun foun tuir mai bele hatene.“Ita nia memoria tenke hakerek hela, tenke rejista hela para ita nia oan sira hatene istoria nia rain rasik,
Livru ho mahar 600 pajinas ne’e hakerek tanba determinasaun no antuziasmu Angela Carascalao nian, la ho ninia insistensia no empenamentu, talves livrus ne’e la hakerek.
“Bainhira Angela Carascalao fo hatene hau kona ba ideas ida ne’e, hau tetu no hau hanoin kleur maibe ikus mai hau simu tanba konsidera dever ida ita hotu nian atu husik hela ba jerasaun foun sira, rejistu kona ba ita nia istoria ne’ebe ita rasik mos partisipa,” hateten Prezidente Taur Matan Ruak, (30/08), bainhira lansa livru ne’e iha Dili Convention Centre, Kaikoli, Dili.
Tuir nia,livru ne’e importante tebes ba jerasaun foun atu hatene klean abut identidade nasional, rejista hela istoria feto ka mane,kompaneirus funu nian ne’ebe lakon sira nia vida ba rai doben ida ne’e atu hetan liberdade.
“Testemunha iha livru ida ne’e sai hanesan omenajen ba sira ne’ebe suik hela ita no ohin la ho ita atu komemora loron 30 de Agostu,” Prezidente TMR fo omenajen.
Livru ida ne’e hanesan testemunha pessoal husi ema ida ne’ebe moris iha funu laran no agora moris dadaun iha paz nia laran. “Ne’ebe to’o tempu atu fo sai ba ema hotu oinsa ita nia funu nia lala’ok,” dehan Xefe Estadu TMR.
Entretantu Aprezentador ba Livrus ne’e Dr. Benjamin Corte Real, hateten maske Prezidenti TMR laiha estudus bo’ot maibe nia iha esperiensia bo’ot hodi halo funu.
“Mais ho ida ne’e mak nia aumenta nia kultura umana, nia konesementu klean ba fenomena hotu-hotu la’os deit iha rai laran maibe evolusaun mundu,lori vitoria ne’e ba iha final,” dehan Aprezentador Dr. Corte Real.
Nia dehan, TMR nudar antigu komandante eis Falintil ida ne’ebe mak ohin loron prejidi ema ida deit sai Xefe do Estadu.
“Nia junta pozisaun as rua ke ita bele dehan, nia sofrementu komesa husi pasadu, nia realizasaun pesoal iha estadu demokratiku prezente,” Aprezentador Corte Real katak.
E livru ida ne’e sai fonte diak ida e bazeia ba ida ne’e profesor sira formula hodi hanorin historia rezistensia ba eskolante sira.
Tuir nia, nia rasik atu lee livru ne’e to’o hotu presiza tempu loron lima, e livru ne’e espesifiku liu hodi deskreve se mak Taur Matan Ruak husi ki’ik to’o nia bo’ot to’o agora.
“Nia ki’ik ne’e oinsa, nia joven ne’e oinsa, nia moris iha ne’eba nia otas oinsa mais depois prosesu politiku moris iha Timor nia ses an la diak, buat sira ne’e koalia hotu iha livru ne’e,” Aprezentador ne’e tenik.
