Membru Parlamentu Nasional (PN) lamenta ho eskola ne’ebe besik estrada ibun tanba bainhira tempu bailoron rai rahun taka tomak eskola ne’e e ida ne’e fo impaktu la diak ba labarik sira nia saude.
Situasaun ida ne’e mak akontese ba estudante sira Eskola Pre-sekundariu Bairo Sentral Distritu Baucau, tanba ne’ebe besik liu estrada ibun, entaun bainhira rai rahun suar maka’as hodi kona hotu labarik sira.
“Eskola Presekundariu ne’e lokaliza iha Bairo Sentral Distritu Baucau ameasadu husi rai rahun tanba ekola besik liu estrada e estrada ne’e la’os aspal,” levanta Deputadu Francisco da Costa, iha plenaria Parlamentu, foin lalais.
Tanba ne’e husu ba Ministeriu Edukasaun atu tau atensaun ba kestaun ne’e, tanba ida ne’e fo impaktu ba prosesu aprendizajen iha eskola.
Iha parte seluk Rede Edukasaun Timor-Leste Coalition of Education (TLCE), David Bendito dehan problema hanesan ne’e la’os akontese deit iha eskola Bairo Sentral maibe iha kuaze ke iha teritoriu tomak.
“Ita Timor seidauk iha mekanismu tata kota ninian ne’ebe mak klaru tanba ne’e eskola hotu mosu emerjensia deit, e kualker fatin sira halo eskola,” Responsavel TLCE ne’e dehan.
Nia rekonese katak, eskola iha estrada ibun fo impaktu ladiak ba labarik sira tanba estudante barak mak kareta soke. “Ezemplu Eskola TK Brazil ninian motor soke labarik monu dala barak ona,” nia tenik.
