Membru Parlamentu Nasional kestiona maka’as servisu Polisia Nasional Timor-Leste (PNTL), liu-liu Polisia Komunitaria (PK) ne’ebe ladun fo seguransa ho diak, tanba ikus-ikus ne’e nivel kriminal komesa aas iha rai laran.
“Hau foin dadauk ba iha Maliana, iha ema ida hetan oho husi ema deskonesidu no akontese mos iha Dili, ne’e signifika polisia ladun halo nia servisu ho diak,” kestiona Deputadu Jacinto Viegas, (03/09), iha PN.
Tanba ne’e na parte husu ba PNTL atu halo seguransa ne’ebe diak, nune’e komunidade sira bele livre hodi hala’o sira nia atividade ho seguru.
Hatan ba kestaun ne’e Komandante Jeral PNTL, Komisariu Longuinhos Monteiro katak, nia parte koalia ona ho Komandante sira iha 13 Distritus kona ba asuntu ne’e.
“Hodi muda sistema Polisia Komunitaria ne’e, e ami koko atu tau osan ba buat sira hanesan ne’e, atu atende situasaun iha rai laran,” dehan Komisariu Monteiro.
Maibe tuir nia, atu asegura seguransa iha rai laran ho diak presiza kontribuisaun husi parte hotu-hotu, liu-liu Xefe Suku no Xefe Aldeia.
“Akuntese dala barak, kuandu polisia ba hola informasaun xefe suku sira mos tauk atu koalia no dehan la hatene, halo nusa maka ita la hatene se kuandu ita ukun bairo ida, no moris lor-loron ho ema, lolos obrigatoriamente Xefe Suku tenke kopera ho polisia,” Komisariu Monteiro dehan.
