“Ho apoiu husi KOICA ne’e ita rezolve ona problema balun maibe dezafiu bo’ot ida mak manutensaun, tanba ne’e nudar Reprezentante Prezidente no Governu husu Ministeriu Edukasaun tenke fera ulun atu lori fabrika arte grafika ne’e ho produtivu, hodi oferese servisu diak ba profesores sira nune’e sira mos bele oferese fali servisu ne’ebe ho kualidade ba alunus sira,” hateten Vise Primeiru Ministru, Fernando Lasama de Araújo, (05/09), bainhira halo inagurasaun ba ba Arte Grafika Nasional no Sentru Imprimi, iha Kampung Merdeka, Comoro, Dili.
Vise PM Lassama ne’e dehan, edukasaun mak futuru ba nasaun, tanba ne’e importante tenke investe maka’as iha setor ne’e.
“Se ita tebe rai maibe la investe iha area edukasaun, ne’e ita bosok malu deit,” tenik Vise PM ne’e.
Vise Lasama esperansa, ho prezensa AGN no Sentru Imprime ne’e, hanesan pasu ida ba Timor-Leste atu poupa orsamentu ne’ebe kada tinan Governu hasai atu halo imprime ba livrus no materias eskola sira durante ne’e.
Iha oportunidade hanesan Ministru Edukasaun, Bendito Freitas promete sei buka mekanismu ne’ebe diak atu garantia manutensaun ba fasilidade hirak ne’e, tanba agora dadaun sira iha ona rekursu ne’ebe natoon atu halo operasaun ba makina ne’e.
“Sentru ida ne’e importante no determinantes tebes ba ita nia futuru liu-liu kona ba produsaun livrus, tanba ne’e governu sei tau orsamentu kada tinan iha Ministeriu Edukasaun atu tau iha manutensaun no kustu operasaun inklui mos funsionariu sira ne’ebe servisu iha ne’e,” Ministru Freitas promete.
Entretantu Vise Prezidente Korean International Cooperation Agency (KOICA), Lee Jong Seon, hateten Governu Korea iha komitmentu bo’ot atu suporta Timor-Leste hodi dezenvolve setor edukasaun, nune’e ema hotu bele asesu ba edukasaun.
“Hau espera katak estudante no mestre sira sei hetan benefisiu husi estabelesementu sentru imprime ne’e,” Vise Prezidente KOICA esperansa.
Enkuantu total orsamentu ba projeitu ne’e rasik hamutuk $4.950.000 Milhaun ho durasaun fulan sia (9) halo konstrusaun ba obra ne’e to kompleta.
