Prezidente re-eleitu GMPTL, Deputada Soares hafoin eleitu hateten sei konvoka reuniaun ida ho movimentu feto sira antes halo planu estratejiku GMPTL nian, tenke bazea ba plataforma husi sira,Rede Asembleia Parlamentar Comunidade Paises da Lingua Portuguesa (CPLP).
“Ami tenke kontinua halo fiskaliza nafatin tau matan maka’as liu tan ba programa ne’ebe Governu iha liu-liu setor edukasaun, saúde, redus pobreza, dezenvolvimentu ema vulneravel sira hanesan target ne’ebe governu tenke atinji ba povu Timor-Leste bazeia ba planu MDG 2015, tanba ita hare feto no labarik mak sai vitima liu ba asuntus sosial sira,” dehan Prezidente eleitu GMPTL, Deputada Soares, (29/08), iha Parlamentu Nasional.
Ema hirak ne’ebe tur iha estrutura foun GMPTL iha III lejislatura mak Deputada Josefa Alvares Soares (Prezidente GMPTL), Deputada Albina Marcal Freitas husi bankada CNRT (Vise Prezidente) no Deputada Aurora Ximenes husi bankada Fretilin (Sekretaris) hodi lidera meja GMPTL durante periodu 2012 to’o 2017.
Alende ne’e Prezidente foun GMPTL ne’e dehan, sira mos sei halo revizaun ba planu estratejiku tuan, nune’e iha buat balun mak la’o ladun diak, presiza aprofunda liu tan iha tinan lima ne’e.
Nia afirma, esbosu lei Trafiku Umanu sai prioridade ida ba GMPTL atu hare tanba ne’e bainhira lei ne’e tama formalmente ona iha Parlamentu Nasional no ajenda ona, GMPTL sei konsulta ho sosiedade sivil sira ne’ebe tau interese iha esbosu lei ne’e.
Iha parte seluk Deputada Bendita Moniz Magno hateten, GMPTL hamriik la’os atu defende partidus maibe atu servi ema hotu liu-liu feto maluk sira nia ezijensia iha rai doben ida ne’e.
“Ami fo fiar duni ba bankada Fretelin Deputada Josefa Alvares Soares, tanba GMPTL hamriik atu koalia feto hotu-hotu nia hanoin, hakarak, terus no susar no sei hato’o lei no buat ruma ne’ebe ita hare iha rai laran ne’e, feto presiza tebes no importante ba feto tanba ne’e GMPTL hamriik atu atende ba feto sira nia susar,” Deputada Magno katak.
Nia espera katak, lideransa feto ba periodu ida ne’e sei rona feto hotu-hotu nia halerik no organizasaun feto sira nia halerik, tanba lideransa GMPTL iha moderadu tebes, la hare ba feto grupu A ho B tanba ne’e importante tebes feto Timor-Leste tenke unidu, hodi luta ba igualidade jeneru iha nasaun ne’e.
