Grupu Feto Parlamentu Nasional (GMPTL) sujere ba Sekretaria Estadu Promosaun Igualidade (SEPI) atu hadia sistema Transferensia Publikas (TP), liu-liu halo monitorizasaun ba projeitu sira nune’e ema hotu liu-liu feto no labarik sira bele hetan benefisiu husi projeitu ne’ebe iha.
Tuir Prezidente GMPTL, Deputada Josefa Alvares Soares programa TP ne’ebe durante tinan lima ba kotuk SEPI implementa hodi hasa’e ekonomia feto sira nian, konsidera fahe osan deit tanba la halo supervizaun ba ezekusaun osan ne’ebe sira aprova.
“Hau hanoin programa transferensia publikas ne’e labele ema ida rua nia proposta mak nafatin ita aprova nia projeitu, se bele karik SEPI tenke halo estudu viabilidade ida tun to’o iha baze hare ema ne’ebe iha duni interese atu hadia nia moris para bele kapasita ekonomia ema ne’e nia moris,” sujere Prezidente GMPTL, Deputada Soares, foin lalais iha Parlamentu Nasional, Dili.
Deputada ne’e mos husu ba SEPI atu tau atensaun mos ba proposta grupo feto sira iha area rurais, tanba sira mak presiza tebes tulun atu hadia sira nia moris.
Iha parte seluk Sekretaria Estadu Promosaun Igualidade (SEPI), Idelta Maria Rodrigues promete, sira sei hadia sistema TP iha tinan lima mai ne’e, atu grupu sira bele hetan projeitu hodi hadia sira nia ekonomia uma laran no bele minimize violensia iha uma laran.
“Ami mos sei halo revizaun ba planu estrategiku SEPI nian rasik, no ami sei hare fila fali kontinuasaun ba programa transferensia publika, hadia mekanismu ne’ebe ami hetan iha tinan lima kotuk ba grupu sira ne’ebe tenke hetan iha 13 distritus,” promete SE Rodrigues.
Alende ne’e SEPI mos sei kontinua hare implementasaun Lei Violesia Domestika inklui harii Uma Mahon hamutuk ho ministeriu save sira atu supporta implementasaun lei ne’e, haforsa papel Grupu Trabalhu Jeneru iha nasional no distrital no tenke asegura katak feto sira iha asesu ba infrastruktura bazikas.
Nia informa, iha 2013 SEPI sei hasa’e orsamentu ba Transferensia Publika e espera katak bele pasa iha aprovasaun Parlamentu no hetan promulga husi Prezidente da Republika.
