“Ami mai atu hasoru maluk ho KAK, Prezidente da Republika inklui donor sira atu hare imformasaun sira ne’ebe presiza atu kombate korupsaun hanesan Lei Anti Korupsaun, lei asesu ba informasaun no lei
protesaun ba sasin maibe susar atu kombate korupsaun tanba ne’e ami mai atu para hare lei sira ne’e lalais hodi luta hasoru korupsaun,” dehan Diretor Regional TI iha Asia Pasific Department, Srirak Plipat, bainhira halao enkontru ho Sosiedade Sivil iha Salaun enkontru ONG Lalenok Ba Ema Hotu (LABEH), foin lalais iha Kampung Baru, Dili.
Tuir Diretor Plipat, boa governasaun, tranparensia no kombate korupsaun nudar papel TI nian iha mundu inklui iha Timor-Leste.
Nia hatutan, papel sosiedade sivil no joventude sira importante tebes hodi halo advokasia no promove lei protesaun ba sasin nian no lei anti korupsaun ne’ebe sei iha Parlamentu no hamutuk nafatin atu rekomenda ba governu atu kria lei deklarasaun asset ba ukun nain sira.
Iha parte seluk Diretor Ezekutivu Fundasaun Mahein (FM), Nelson Belo hateten nudar Timor oan sira kontente tebes tanba delegasaun TI hala’o vizita ho lideransa Timor-Leste nian no KAK koalia ona kona ba prioridade ne’ebe presiza, liu-liu atu kombate korupsaun iha rai laran.
Tuir nia,korupsaun buras iha rai laran tanba Timor-Leste seidauk tau lei hanesan numeru um iha nasaun ne’e.
“Komando so maun abut sira mak komando, tanba ne’e korupsaun kontinua buras ba bei-beik povu kontinua terus tanba ne’e ami husu ita bo’ot sira nia tulun atu kombate korupsaun iha ami nia rai ida ne’e,” Diretor Belo dehan.
Nia konsidera katak prezensa Komisaun Anti Korupsaun (KAK) hanesan Kurtina deit laiha nehan atu tata koruptor sira signifika katak lei maske lei iha ona maibe la aplika.
