Rede Feto (RF) Timor-Leste kolabora ho Ministeriu Solidariedade Sosial (MSS) liu husi Departementu Apoia Feto halo sosializasaun Standard Operational Procedur (SOP) kona ba Violensia Bazeia ba Jeneru (VBJ) ba iha komunidade sira liu-liu Rede Referal iha Pante Makasar, Distritu Oe-Cusse.
Diretora Ezekutiva RF, Jacinta Luzinha hateten, objetivu husi sosializasaun SOP ba Rede Referal, atu sira sai mata dalan bainhira ajuda vitima Violensia Domestika no Violensia Bazea ba Jeneru.
“Atu haforsa deit Rede Referal ne’ebe maka durante ne’e estabelese tiha ona iha Oé-Cusse husi MSS hanesan PRADET, FEEO, FFSO FPWO,VPU, OPL no OXFAM, nune’e bele atende vitima ho diak hodi submete ba prosesu ne’ebe maka iha,” dehan Diretora Luzinha, durante vizita iha foin lalais iha Oe-Cusse.
Nia espera katak, iha futuru bele ona ezamina informasaun prekore hotu suku 18 ne’ebe ejiste iha Distritu Oe-Cusse kona ba VBJ no VD.
Entretantu Diretora Fundasaun Esperansa Enklave Oe-Cusse (FEEO), Marita de Jesus Marques konsidera ezaminasaun ne’e atu haforte liu tan rede referal ne’ebe Distritu Oe-Cusse iha ,para oin sa halo knar ho diak liu tan.
“Informasaun sira nebe maka ohin loron ita simu husi Rede Feto ne’e importante tebes, hodi dezenvolve liu tan atividade Rede Referal iha rai laran no hametin tan relasaun entre instituisaun,” hateten Diretora FEEO ne’e.
Diretora Marques mos apela ba Rede Referal atu halo kontaktu ba malu, liu-liu bainhira hasoru difikuldade durante ezekuta knar.
Iha fatin hanesan Xefe Unidade ba Ema Vulneravel (VPU) Distritu Oé-Cusse, Agustinho Fras katak sira iha linha kordenasaun ne’ebe diak ho parseiru servisu wainhira hasoru vitimas.
