Organizasaun Non Governmental (NGO) Internasional Caritas Australia halo enkontru evaluasaun ho Agrikultor sira husi Suku Sun Ufe, Sub-distritu Nitibe, Distritu Oe-Cusse kona ba rezultadu implementasaun orientasaun servisu husi sistema tradisional ba modernu.
“Sistema servisu ne’ebe maka ami aplika no hanorin ba to’os nain sira, maka sistema halo to’os ho modernu, e ho sistema foun ne’e hetan duni mudansa signifikante maibe klimatika mak ladun diak,” hateten Koordenador Programa Caritas Australia, Cornelio Ase, foin lalais iha Oe-Cusse.
Entretantu Agrikultor Agustinho Salem, sente kontente ho sistema modernu ne’e tanba fo duni benefisiu ba agrikultor sira maibe estrada mak ladiak.
“Ami kontente ho esforsu Caritas Australia ne’e tanba hanorin ami oinsa halo to’os ho sistema modernu, bele aumenta ami nia produsaun produtu lokal, maibe ami triste tanba estrada ladiak atu ami bele lori ami nia produtu ba merkadu,” dehan Agrikultor Salem.
Iha parte seluk Diretor Agrikultura Distritu Oé-Cusse, Jose Oki katak tinan ne’e agrikultor sira iha produsaun ne’ebe diak maske gafanutu ataka plantasaun hare no batar no mudansa klimatika.
“Tuir ami nia observasaun, ita nia aihan lokal sei sufsiente to’o fulan Novembru tinan ne’e,” tenik Diretor Oki.
