Reprezentante Sosiedade Sivil Distritu Oe-Cusse, Juvinal Faria eziji ba Governu atu tau atensaun ba kestaun ne’e tanba kada tinan Parlamentu aloka orsamentu ba setor saude ho montante ne’ebe bo’ot.
“Governu tenke tau prioridade, labele husik situasaun ne’e kontinua akontese, pasiente kuandu moras maka ita tula iha kareta mikrolet ka truk ka motor ojek, ne’e fo impaktu maka’as ba sira nia rekoperasaun saúde,” eziji Reprezentante Sosiedade Sivil, Juvinal Faria, foin lalais iha Oe-Cusse.
Atu problema hanesan labele akontese tan iha futuru, Reprezentante Sosiedade Sivil ne’e sujere, Governu sentral tenke desentraliza poder finanseira ba iha distritu.
“Nudar sosidade sivil propoin ba iha nai ulun sira, atu labele kumu metin poder osan nian iha nasional pelumenus oferese osan oituan mai kraik, para distritus sira bele responde nesesidade povu nian,” Faria sujere.
Hatan ba kestaun ne’e Diretor Ospital Referal Oé-Cusse (HRO), Antonio Boqifai katak, asuntu ne’e nia parte dalabarak ona hato’o ba nasional, maibe to’o agora laiha rezultadu.
“Dalabarak hau hato’o liu husi sorumutu iha nivel nasional, to’o hau mos hetan kecaman tanba dehan koalia barak liu, maibe hau hatan katak ne’e hau tenke koalia,e sira dehan orsamentu seidauk iha,” Diretor Boqifai tenik.
Nia espera katak, Governo liu-liu ho liderasan Ministru Saúde foun ne’e bele tau konsiderasaun ba problema ne’ebe HRO infrenta durante ne’e.
