Estudante Medisina ne’ebe halo estajiu iha Ospital Referal Oe-Cusse fulan tolu (3) ona la simu osan subsidiu ne’ebe Governu fo ba sira no situasaun ida ne’e difikulta sira nia atividade estajiu.
“Ami nia osan subsidiu demora fulan tolu ona seidauk selu ami, e kolega sira ihandistritu seluk selu tiha ona, tanba saida prosesu ne’e tarde, tenke esplika para bele hatene, tanba ami iha ne’e la’os Oe-Cusse hotu, balun husi Baucau, Lospalos no husi Maliana,” dehan Estudante ne’ebe halo estajiu iha Ospital Referal Oe-Cusse, Bartolomeu Perreira, foin lallais iha Oe-Cusse.
Estudante ne’e dehan, antes ne’e prosesu pagamentu subsidiu halao husi Ministeriu Saude, maibe agora entrega tiha knar ne’e ba iha Ministeriu Edukasaun. “Uluk Ministeri Saude mak sei kaer,pagamentu la tarde, agora tarde los, ministeriu relevante tenke rezolve lalais problema ne’e,” Estudante ne’e sujere.
Lamentasoens hanesan mai mos husi Estudante Heribertus Alves, tanba ne’e nia parte husu ba governu au toma atensaun ba asuntu ne’e, nune’e sira bele halao sira nia estajiu ho diak.
“La’os ami hato’o keisa maibe presia Governu rezolve ho seriu, tanba ami nia kolega iha distritu seluk hetan ona sira nia direitu,” Estudante Alves eziji.
Entretantu Estajiadu João Freitas husi Distritu Baucau hateten sira presiza duni subsidiu ne’e hodi sustenta ba sira nia moris lor-loron nian.
Hatan ba preokupasaun ne’e Diretor Servisu Saúde Distritu Oé-Cusse, Agusto Tolan katak prosesu ne’e tarde iha sentral Ministeriu Finansas nian.
“Ami distrital halo relatoriu kada triwulan aneksa ho sira nia absensi haruka ba Mnisteriu Saúde, prosesa fali ba edukasaun depois maka halo kordenasaun ho UNTL haruka fali ba Ministeriu Finansas iha nasional maka foin selu,” Diretor Tolan esplika.
Alende ne’e prosesu pagamentu dalaruma tarde tanba tuir Diretor Tolan, wainhira estudante halo rotasaun husi Distritu seluk mai Oe-Cusse la halo linha kordenasaun.
