Ospital Referal Oe-Cusse (HRO) rejistu labarik ho kazu mal nutrisaun hamutuk nain 12, kompostu husi feto neen (6) no mane neen (6), e nain ida mate tanba komplikadu ho moras seluk.
Tuir Diretor Ospital Referal Oe-Cusse, Antonio Boqifai katak kauza husi mal nutrisaun tanba familia barak mak ekonomia uma laran sei fraku.
“Barak liu mai husi foho tanba ekonomia fraku e kauza ida mos tanba familia balun labarik barak liu, entaun konsekuensia labarik balun hetan mal nutrisaun,” hateten Diretor HRO, Boqifai, foin lalais iha Oe-Cusse.
Diretor ne’e dehan, mal nutrisaun akontese tanba inan aman mak laiha kreatividade oinsa mak bele produs aihan ne’ebe iha mutrisaun diak.
Iha fatin hanesan Diretur Saude Distritu Oé-cusse, Agusto Tolan hateten, sira nia parte agora dau-daun halo esforsu hodi halo koordenasaun ho Agencia World Fund Program (WFP) hodi hare prblema mal nutrisaun ne’e.
“Liu husi programa SISCA bele fahe netik batar uut, nune’e inan aman sira bele produs didiak aihan ne’e, tanba batar uut ne’e riku ho nutrisaun,” dehan Diretor Tolan.
Iha sorin seluk Jacinta Mendes Guteres, Komunidade mos nudar inan ida, hateten, mal nutrisaun la’os deit hare husi ema nia fiziku ne’ebe ki’ik, tanba dalaruma maske ema ne’e isin ki’ik maibe forte.
“La’os dehan mala’e sira nia isin mesak bo’ot hotu, depois hare Timor oan nian ki’ik dehan ida ne’e tanba mal nutrisaun, ne’e la loos, tanba rasa Timor oan la hanesan ho malae,” Komunidade Guterres tenik.
