Ahi eletrisidade ne’ebe agora mate lakan fali iha kapital Distritu Oe-Cusse halo komsumidor sira lamenta no husu ba Tekniku EDTL Distritu ne’e atu esklarese ba iha komunidade sira.
“Tenke esplika tanba saida maka ikus-ikus ne’e ahi la lakan tuir orariu ne’ebe iha, e ahi mate lakan labele sai fali tradisaun mai ita Oe-Cusse oan, makina mak aat, mina mak laiha ka jestaun mak la diak,” eziji Komsumidor Teotonio Tolan, foin lalais, iha Oe-Cusse.
Tuir nia, lolos ahi labele mate lakan, tanba jerador foun ho kapsidade ne’ebe natoon atu fornese enerjia eletridade ba komunidade sira.
Preokupasaun hanesan mai mos husi Joventude Domingos Lafu, katak situasaun ne’e fo impaktu ba klientes tomak liu-liu ba estudantes sira bainhira atu estuda iha tempu kalan.
Entretantu hatan ba kestaun ne’e Responsavel Operador EDTL Distritu Oé-Cusse, Ancelmos dos Santos katak, fornesimentu ahi ladun diak tanba kombutivel menus inklui mos bateria jerador nian mak fraku.
“Distribuisaun mina husi nasional maka tarde, alende ne’e ita nia aki (bateria) maka menus, presiza halo karegamentu, ne’e han oras rua to’o tolu maka foin bele hamoris jerador,” hatan Responsavel EDTL Distritu Oe-Cusse ne’e.
Ho problema ne’e Responsavel dos Santos, lori Instituisaun EDTL Distritu Oe-Cusse nia naran husu deskulpa ba klientes tomak. “pasensia oituan hodi hein alokasaun mina husi nasional hafoin sei lakan tuir orariu normal,” Nia tenik.
