Hafoin hala’o knar hodi ajuda Polisia Nasional Timor-Leste (PNTL) fo seguransa ba povu kiha nasaun doben Timor-Leste durante tinan barak nia laran, Komando Jeral PNTL entrega medalha solidariedade ba Polisia Nasoens Unidas (UNPOL) nain 16.
“Kondisaun hanesan ne’e ita halo tiha ona desde 2008 kedas, la’os primeira vez ita fo ba sira, ita fo ba sira tanba durante ne’e sira hala’o servisu ho ita asegura seguransa,” dehan Komandante Jeral PNTL, Komisariu Longuinhos Monteiro, foin lalais iha Kaikoli, Dili.
Membru Polisia Nasoens Unidas nain 16 ne’e kompostu husi nasaun Korea iha nain tolu (3), Zimbabwe nain 10 no husi Kroasi iha nain hat (4).
Komisariu Monteiro dehan, tuir dekretu lei artigu 15, lolos medalha solidariedade ne’e Prezidente Republika maka iha kompetensia atu atribui, maibe atual Prezidente ho nia inisiativa delega kompetensia mai komando, atu komando fo medalha ne’e ba sira.
Entretantu Deputadu Francisco Branco,dehan ne’e nudar atividade regular husi pais ne’ebe maka hetan ajuda husi Membrus Polisia Internasional sira.
“Ita fo agradesementu ba sira, tanba durante ne’e ita iha relasaun diak ho sira ne’e duni ita presiza halo hanesan ne’e,” dehan Deputadu Branco.
