Rekrutamentu Polisia foun ba tinan ne’e sei hala’o iha fulan Setembru ho total ema nain 260 hodi kompleta rekursu umanu iha Instituisaun ida ne’e.
“Rekrutamentu segunda faze ne’e ami espera katak iha fulan Setembru la’o ona, no iha Outobru bele tama ona iha Sentru Formasaun,” dehan Sekretariu Estadu Seguransa (SES), Francisco Guterres, foin lalais iha Dili.
Tuir nia, rekrutamentu foun 260 pesoas ne’e atu kompleta rekursu umanu iha parte unidade balun ne’ebe sei falta, e membrus ne’ebe agora daaun iha seidauk koresponde ho situasaun iha rai laran.
Entretantu Deputadu Pedro da Costa Martires, hateten Instituisaun PNTL presiza duni halo rekrutamentu, nune’e bele fo seguransa ne’ebe diak iha rai laran.
“Ne’e diak nune’e bele garante estabilidade no pas iha rai laran, no instituisaun PNTL labele halerik tan kona ba rekursu umanu,” Deputadu ne’e apoia.
Deputadu ne’e sujere, atu halo selesaun ne’ebe mak diak iha rekrutamentu ne’e, nune’e ema ne’ebe tama iha Polisia servi duni povu iha rai ida ne’e ho profesional.
“Nia tenke kumpri duni rekizitu ne’ebe maka iha, ne’e faze ne’ebe maka importante,” Deputadu Martires sujere.
