“Tanba motor ne’e sira sosa iha perbatasan no balun laiha dokumentus, sira uza tiha no hakarak sosa foun, entaun sira fa’an fali ba ema seluk, sira fa’an iha dalan-dalan sira ne’e, ami sei halo operasaun ba ida ne’e,” dehan Komandante Polisia Tranzitu, Xefe Antonio Soares, foin lalais iha Kaikoli, Dili.
Tanba ne’e PNT sei kopera hamutuk ho Ministeriu Comersiu Industri hodi halo operasaun ba ema hirak ne’ebe halao atividade ilegal ida ne’e.
Entretantu Deputadu Francisco Branco, hateten oras ne’e dadaun atividade fa’an motor ilegal buras los iha Timor-Leste, e polisia tenke tau atensaun ba kestaun ne’e.
“Ne’e kompetensia polisia nian, oinsa para ema labele halo atividade hanesan ne’e,” dehan Deputadu Branco.
Motor ilegal barak iha rai laran, komunidade barak maka gosta liu sosa motor iha fronteira, tanba presu ne’ebe baratu, maibe laiha dokumentus.
