Membru Parlamentu Nasional konsidera promosaun divizaun iha Instituisaun Polisia Nasional Timor-Leste (PNTL) ne’ebe maka hala’o iha fulan hira liu ba la justu, no diskunfia uza sistema familiarismu.
“La hare kona ba ema nia durasaun servisu, la hare ema nia matenek, tanba ami hare katak polisia ne’ebe maka sae diviza barak liu eis polisia iha tempu Indonezia nian,ne’e familiarismu,” kritika Deputadu Paulo Moniz Maia, foin lalais, iha PN.
Tuir lolos Sekretariu Estadu Seguransa no Komando Jeral PNTL tenke fo oportunidade ba Polisia jovens sira ne’ebe maka ho ninia kapasidade intelektual.
“Ida ita nia joven sira ne’ebe maka hanesan ema S1 formadu, dalaruma sira ne’e la sa’e diviza, maibe hare liu fali ba sira seluk, ne’e preokupasaun bo’ot ida ba ami,” Deputadu Maia kestiona.
Entretantu Komandante Jeral PNTL, Komisariu Longuinhos Monteiro, hateten ne’e kompetensia Governu ho Komisaun ne’ebe maka toma konta ba promosaun diviza ne’e.
“La’os kompetensia hau nian para atu esplika,maibe hau so dehan deit, hau la’os atu fo kritika maibe ita tenkeser tau ita nia persepsaun ida hanoin hanesan ita atu haburas unidade nasional, no labele koalia kona ba eis no ema nia tempu pasadu,” dehan Komisariu Monteiro.
Komisariu ne’e esperansa katak komisaun ne’ebe maka hala’o atividade ne’e ho profesionalismu, iha problema lamentasoens ga laiha lamentasoens ne’e problema ketak ida tanba komisaun ne’ebe maka hala’’o promosaun ne’e Governu maka hari.
