Funsiunariu sira iha Sekretariu Estadu Joventude no Desportu (SEJD) inklui Membrus Polisia Nasional Timor-Leste (PNTL) husi Unidade Sentru Treinamentu Akademia Polisia no Unidade Bataliaun Orden Publiku (BOP)hala’o atividade doasaun ran, nudar kontribuisaun ba Banku Sangue Nasional, hodi ajuda pasiente ne’ebe presiza.
“Ita hatene katak atividade doasaun ran ne’e sentimentu umana ne’ebe ema hotu iha, hodi bele apoiu ema seluk hanesan ema moras no pasiente ne’ebe oras ne’e difisil atu hetan ran iha ospital liu husi atividade ida ne’e ita bele ajuda sira,” dehan Diretor Nasional da Joventude, Lamberto Viana, (28/08), bainhira halo abetura ba atividade doasaun ran iha edifisiu SEJD, iha Sional, Dili.
Alende atividade doasaun ran, SEJD mos iha atividade seluk ba joventude sira hanesan futsal, jalan santai no sei halo workshop no aprezentasaun muzika husi joventude sira.
Atividade hirak ne’e hala’o atu selebra loron internasional ba joventude sira ne’ebe monu iha 12 Agustu kada tinan, nune’e sir abele hola parte iha prosesu dezenvolvementu nasaun ida ne’e.
Enkuantu total orsamentu ba selebrasaun ne’e ho montante $10 mil, liu-liu ba atividade futsal sei fo premiu ba manan nain sira, iha primeira lugar sei hetan osan ho montante $1.000, segundu $750, terseiru $500 no kuatru lugar $250, e ba partisipante jalan santai nia premiu mak Televizaun, Telefone, Kipas Angin, no Rice Cooker.
Entretantu Diretor Jeral Sentru Treinamentu Akademia Polisia (STAKMIL), Superintendente Carlos Jeronimo hateten bazea ba proposta husi SEJD ne’ebe husu membrus PNTL nain 50, 25 husi Sentru Treinamentu (polisia foun) no BOP nain 25 e ohin sira halo doasaun ran.
“Hau sente katak ita nia alin kadet sira ne’e bele mos kontribui buat ruma liu husi prosesu ida ne’e hodi selebra loron internasional joventude sira, ita espera ho ran oituan ne’ebe sira iha bele mos salva ema seluk nia vida,” dehan Diretor Jeral STAKMIL ne’ebe partisipa iha atividade ne’e.
Iha parte seluk Xefe Departementu Banku de Sangue Nasional (BSN), Arsenio Jose dehan, kada tinan SEJD sempre halo doasaun ran bainihra selebra loron mundial joventude esentimentu umanu ne’ebe sira halo ne’e, hanesan pasu positive ida.
“Atividade ne’e importante tebes atu nune’e it bele tulun ita nia maluk sira ne’ebe presiza tebes ran, tanba ran la fa’an maibe ho sentimentu umana no ho domin bo’ot atu ajuda malu,” dehan Xefe Departementu.
Nia dehan, depois sira halo kolekta ran, sira sei lori ran hirak ne’e ba prosesa iha laboratorium BSN nian atu detekta sira nia golongan ran (golongan darah) ho lolos no hatene ran ne’e livre husi moras infeksaun hanesan HIV/SIDA, Hepatitis no Sipilis.
Xefe Departementu ne’e espera, ho atividade koleta ran ne’e sira bele hetan 30 (30 bungkus) stok ne’ebe negativu nune’e bele aguenta servisu Banku de sangue nian.
