“Ita nia etika de servisu no disiplina servisu ne’e menus liu, ezemplu ita servisu oras ida fuma oras ida tanba ne’e ho hanoin katak integra ema estranjeirus sira ne’ebe espertu iha area sira ne’e para transforma konesementu no disiplina servisu nune’e ita bele hadia etika servisu no prestasaun servisu ho kualidade, disiplina no lalais,” dehan Inspetor Jeral du Trabalhu iha Sekretariu Estadu Politika Formasaun Profesional no Empregu (SEPFOPE), Aniceto Leto Soro, foin lalais iha knar fatin Kaikoli, Dili.
Nia hato’o kestaun ne’e relasiona ho kompania barak iha rai laran ne’ebe maioria kaer husi ema estranjeiru inklui fo servisu ba ema estranjeiru, nune’e bele halo servisu ho disiplina no iha kualidade servisu ne’ebe diak, tanba ne’e trabalhador Timoroan presiza aprende husi sira.
Nia hatutan, trabalhador Timoroan dalabarak oras servisu uza ba interese privadu, e alende ne’e sira servisu seidauk kleur maibe eziji ona sira nia direitu “Ida ne’e difisil tebes ba kompania atu fo konfiansa ba sira,” Inspetor Jeral ne’e tenik.
Tanba ne’e nia husu ba Trabalhador Timoroan hotu, atu aproveita oportunidade hodi aprende husi ema estranjeiru iha area servisu ne’ebe espesifiku, hodi adopta sistema servisu ne’ebe sira uza.
Entretantu Membru Parlamentu Nasional, Deputada Josefa Alvares Soares konkorda ho hanoin husi Inspetor jeral du Trabalhu ne’e, e trabalhador Timoroan presiza muda sira nia mentalidade no disiplina servisu.
“Hau hanoin ita Timor mos ita tenke akostuma ita nia an, kuda kualidade ida ne’e iha ita nia laran para ita bele avansa ba oin kompete ho ema seluk, se lae kompania sira kontinua lori ema husi estranjeiru atu hala’o servisu ida ho kualidade no lalais,” sujere Deputada Soares.
