Feto Timor-Leste iha espetativa ne’ebe bo’ot tebes atu promove igualidade jeneru, liu-liu esforsu husi Sekretaria Estadu Promosaun Igualidade Jeneru (SEPI) no Movimentu Feto Timor-Leste halo durante ne’e,tanba agora dadaun numeru feto iha Parlamentu Nasional atinji ona 37 pursentu, kompara iha II lejislatura ne’ebe hetan deit 29 pursentu.
“Presentajen feto iha Parlamentu Nasional ita liu tiha ona ita nia tarjetu Millenium Development Goals 2015, ita hare iha primeiru Asembleia Konstitusional ita iha 26 pursentu reprezentante feto iha parlamentu, iha 2007-2012 iha 29 pursentu, e agora dadaun iha 37 pursentu. Hau hanoin se la sala ita numeru 3 iha mundu,” dehan SE, Idelta Maria Rodrigues, (24/08), bainhira hala’o enkontro ho membru Rede Feto iha Fundasaun Alola, Mascarenhas, Dili.
Numeru ne’e tuir SE Rodrigues, sai hanesan numeru estimasaun ida husi SEPI maibe SEPI sei halo peskiza ida kona ba numeru feto iha Parlamentu Nasional entre nasaun hotu hodi halo komparasaun.
Maske nune’e, SEPI husu ba feto Timor tomak atu labele kontente ho numeru ida ne’e, maibe tenke hare ba kualidade frutu debates ne’ebe feto maluk sira halo iha Uma Fukun Parlamentu.
Kontente ho numeru feto 37 pursentu iha Parlamentu, maibe SEPI triste tanba involvementu feto iha nivel lokal sei menus tebes,e presiza esforsu ne’ebe makas husi feto hotu atu halo avaliasaun mudansa politika iha area nivel nasional no distrital.
SE Rodrigues dehan, luta ba asuntu igualidade jeneru la’os fasil, tenke esforsu ne’ebe maka’as, presiza hare ba implementasaun lei, orsamentu jeral e SEPI sei koalia asuntu ne’e iha Ministerial no Sekretariu Estadu hotu no hare sira nia politika hodi hatama perspetiva jeneru iha planu ministerial nian.
Iha parte seluk Diretora Rede Feto, Yasinta Luzina, sente orgulhu ho numeru ida ne’e, maibe husu atu esforsu aan nafatin hodi promove igualidade jeneru iha setor hotu, tanba sei iha obstaklu barak mak sei hasoru iha future.
“Sei iha dezafiu no obstaklu barak mak feto sira sei hasoru iha future, ita hatudu ona ita nia reprezentante iha parte kuantidade maibe ita mos tenke hatudu kualidade ne’ebe diak, hatudu katak feto mos iha abilidade ne’ebe diak,” Diretora ne’e dehan.
