“Grupu ne’ebe hetan susesu ne’e hamutuk 15, kompostu husi Distritu Manufahi, Aileu no Maliana, ami espera katak ba oin grupu sira seluk ne’ebe sei presiza ami nia tulun, ami prontu fo apoiu nafatin hanesan fasilidade tekniku, nune’e sira bele dezenvolve diak liu tan iha futuru husi treinamentu ne’ebe ami fo ba sira,” dehan Diretora FKSH, Gisela da Cruz de Carvalho, (22/08), iha serimonia aniversariu FKSH ba dala X iha Kuluhun, Dili.
Diretora ne’e dehan, hafoin tinan 10 FKSH hamrik, no fo kapasitasaun kona ba manajementu finanseira ba grupu feto sira iha area rural, e total grupu feto kapasitadu hamutuk 64 h sira nia membru 700 maibe grupu 15 foin susesu.
“Sira hirak ne’ebe hetan susesu iha negosiu ki’ik hanesan suku farda, halo dosi, fa’an aimoruk tradisional, loke kios e balun kuda modo depois fa’an fali,” Diretora ne’e informa.
Alende ne’e FKSH mos sei halo nafatin monitorizasaun no apoiu moral ba grupo feto sira ne’ebe hetan ona susesu bainhira sira presiza.
FKSH rasik durante ne’e hetan apoiu finanseiru husi Canadian Catholic Organization for Development peace (CCODP), Terre de H. Netherlands (TDH) inklui UNFPA no seluk tan, hodi hala’o programa kapasitasaun iha distritus.
FKSH esperansa, ba futuru sira bele nafatin fo apoiu ba inan feto sira ne’ebe presiza tulun inklui halo ligaxsaun ne’ebe mak diak ho parseirus no doador sira, nune’e bele habelar liu tan FKSH nia programa,liu-liu ba distritu ne’ebe seidauk tama.
Entretantu tuir Prezidente Board FKSH, Ivete Oliveira katak, harii organizasaun ida la’os fasil maibe ho espetativa ne’ebe feto maluk sira iha atu fo tulun ba sira ne’ebe iha area rurais, hodi hatudu progresu ne’ebe diak.
“Hau lori organizasaun feto nia naran hato’o orgulhu bo’ot ida ba progresu ne’ebe FKSH hala’o ona durante tinan sanulu nia laran,” dehan Prezidente Board FKSH ne’e ho kontente.
Organizasaun FKSH hari husi Feto Foinsa’e nain hat (4) ne’ebe nakonu ho espetativa atu enkoraja no kapasita feto maluk sira iha area rural, alende konsola sira oinsa bele involve iha vida politika, mos iha setor hotu.
Enkuantu iha fatin hanesan, Reprezentante Grupu Feto Benefisiaria, Deolinda konta, uluk antes tuir formasaun iha FKSH, nia sempre halo kreditu iha banku no negosio sempre monu tanba la hatene halo manajementu.
“Agora hafoin tuir formasaun husi FKSH hau nia negosio komesa la’o diak no ikus mai hau bele sosa kareta ida hodi tula sasan ba fa’an iha merkadu,” dehan Benefisiaria ne’e ho kontente.
“Hau hakarak hato’o parabens ba FKSH nia aniversario ba dala X, hau espera katak FKSH nafatin kontinua apoiu no fo kapasitasaun ba feto sira nune’e sira bele sai indepedente hanesan mos hau,” Deolinda esperansa.
