“Nia kuandu mai ne’e sempre ho kondisaun lanu, hau rona husi nia kolega sira dehan nia hola tan feto ida ona, maibe hau la sibuk ida. Kuandu nia mai ona ne’e hau la bele kolia hasoru, se lae saida maka iha nia oin ne’e nia uza tuda hau, se lae nia baku hau,” deklara Lezada ES iha Tribunal Distrital Dili (TDD) (24/08).
Ho situasaun ida ne’e, Lezada sente sofre tanba ne’e husu ba Tribunal atu fo sansaun ne’ebe adekuadu duni tuir nia hahalok ne’ebe nia halo.
“Hau hakarak tribunal fo peringatan ba nia, se kuandu nia halo tan hahalok hanesan ne’e, tribunal fo nia sansaun ne’ebe maka todan hodi nia bele muda nia hahalok at ne’e,” Lezada ES husu.
Entretantu Arguidu AR rekonese katak nia selingkuh duni ho feto seluk maibe uluk.
“Uluk hau selingkuh duni mais agora la’e ona, kuandu hemu tua, hau hemu duni, e hau baku nia ne’e, hau la sadar ida tanba hau lanu hela,” deklara Arguidu AR, iha TDD.
Iha julgamentu ne’e Arguidu arepende no promete sei la halo tan hahalok at ne’e iha future. “oan sira mos komesa bo’ot ona, tempu to’o ona hau muda hau nia hahalok aat ne’e,” promete Arguidu.
Tribunál Distrital Dili (04/09) kondena arguidu ba kazu violénsia doméstika ne’e ba tinan tolu (3) kadeia, suspende ba tinan hat (4), relasiona ho krime maus tratus ba nia kónjuje.
