“Ami kiha lejislatura uluk la halo, tanba ne’e agora komisaun de etika iha tan servisu adisional tama iha nia area tematikas nian, tenke tau matan,” hateten Sekretaria Meja Parlamentu, Deputada Maria Fernanda Lay iha PN.
Tuir Deputada Lay, deklara riku soin tenke tuir lei no tenke servisu hamutuk ho Instituisaun hotu atu nune’e bele ajuda Komisaun Anti Korupsaun KAK) bele tau matan ba korupsaun ninian.
Kona ba lei deklara riku soin ne’ebe iha ona, tuir nia, jeral liu no presiza kria lei espesifiku.
“Ami iha ona hanoin atu kria lei espesifiku maibe ami tenki servisu hamutuk ho instituisoens hotu tanba ita hanesan nasaun foun hanesan buat foun ida ba ita, tan ne’e komisaun etika mak tenki tau matan ba asuntu ida ne’e,” Deputada Lay tenik.
Entretantu Deputada Domingas Alves da Silva ‘Bilo-Mali’ rezeita atu deklara nia riku soin tanba laiha baze legal.
“Iha artigu ida ne’ebe mak koalia kona ba ema ne’ebe mak hola parte iha soberania tenke deklara nia riku soin,” dehan Deputada ne’e.
Maske nune’e Deputada ne’e pronto atu deklara nia riku soin bainhira iha lei espesifiku ida, maibe nudar veteranus nia laiha riku soin ne’ebe atu publika ba publiku.
“Hau ejiste iha 24 anos iha ailaran ne’eba hau tun mai ate hau nia uma hanesan fahi luan, ne’ebe hau nia riku soin saida mak hau atu deklara,” hateten Deputada Bilo Mali.
Enkuantu Deputadu Mateus de Jesus katak, Deputadus sira la presiza deklara sira nia riku soin tanba Membru parlamentu la kaer osan.
“Hau ba esklarese hau nia riku soin atu halo saida tanba Parlamentu la’os kaer osan, parlamentu so hatene osan no aprova osan,” Deputadu de Jesus informa.
Tuir nia, ezemplu ne’ebe mak Prezidenti da Republika deklara ona nia riku soin ba iha Tribunal Rekursu, ne’e atu ema ida-idak lori ninia sasan ba rejista.
