Maske Governu lokal hasai no implementa ona sirkulasaun trafiku animal kleur ona, maibe komunidade kontinua husik animal arbiru iha vila laran, tanba falta de konsiensia husi animal nain sira.
“Balada nain barak iha kapital Distritu Oé-cusse seidauk iha konsensia Diak atu kesi ka tau dok sira nia animal hakiak hanesan karau no bibi sira,” preokupa Xefe Suku Costa, Aleixo Abi, (21/08), iha Kapital Distritu Oe-Cusse.
Xefe Suku ne’e haktuir, antes ne’e sira halo ona sosializasaun no fo avizu ona ba komunidade sira atu labele husik animal arbiru iha vila laran.
Tuir planu, iha tempu badak sira sei halo operasaun ba animal hirak ne’ebe durante ne’e husik deit iha vila laran.
Enkuantu Animal Nain, Miguel Gama katak, sira prontu atu fo apoiu ba operasaun ida ne’e nune’e bele mantein ambiente ne’ebe moos no saudavel.
“Hau nudar animal nain pronto atu kopera hamutuk ho desizaun nai ulun governu local, naran katak atividade ne’e la’o nafatin, lalika mosu lakon no tenke hamos sidade laran labele husik du’ut maka nakonu,” Animal Nain ne’e sujere.
Entretantu Xefe Servisu Agua e Saneamentu (SAS) Distritu Oé-Cusse, Jose Suni Teme dehan sirkulasaun trafiku ne’e diak ba populasaun, maibe komunidade rasik mak seidauk iha konsiensia.
“Ne’e katak presiza halo sosializasaun nafatin ba komunidade hodi kompriende no implementa,” Xefe SAS ne’e sujere.
Enkuantu tuir Administrador Distritu Oé-Cusse, Jose Tanesib Anunu katak, sirukulasaun trafiku animal sosializa , so ke seidauk halo operasaun ba animal sira ne’ebe husik arbiru iha vila laran ne’e.
“Ne’e hanesan meius ida atu evita moras ne’ebe hadaet husi animal no asidente trafiku inklui mos garantia ambiente moos ba saude populasaun nian, e mos preparasaun ba festa tinan atus lima malae Portugal deskobre Timor liu husi Lifau ne’ebe sei hala’o iha tinan 2015,” Administrador Anunu dehan.
