Kondutor kareta mikrolet sira iha Distritu Oe-Cusse halo asaun pasifika nudar asaun rejeita ba kareta kamioneta sira ne’ebe tula pasajeiru husi foho mai to’o iha kapital Oe-Cusse.
“Razaun ami halo asaun ne’e, tanba kareta kamioneta la kumpri sira nia jalur ne’ebé servisu transporte fahe tiha ona katak : truk sira tula pasajeirus to’o deit merkadu Tono no Maumate ,maibe realidade sira tula pasajeirus to’o vila laran, lei la permiti atu truk tula pasajeirus,” protes Porta vos Kondutor Mikrolet, Armindo Lafu, iha Edifisiu Transporte Regional Oe-cusse, iha Oe-Cusse.
Kondutor Mikrolet sira ne’e ameasa, sira sei halo asaun greve, bainhira problema ne’e Servisu Transporte Rejional Oe-Cusse la rezolve.
“Dala barak ona durante ne’e ami haree no pasensia deit,e iha ikus-ikus ne’e,demais ona maka ami ohin halo mogok, kuandu laiha solusaun husi DNTT ami sei halo asaun ne’ebé grave liu,” ameasa,’’ Motorista ne’e ameasa.
Iha fatin seluk Motorista Kareta Kamioneta Rose Lalisuk, sujere ba governu atu estabelese terminal ida, nune’e sira bele transfere fali pasajeirus ba mikrolet.
“Governu presiza hari terminal, atu nune’e kareta truk ka bis tula penumpang husi foho mai para deit iha terminal hafoin transfere fali ba mikrolet,” sujere Motorista ne’e.
Hatan ba kestaun ne’e, Diretor Servisu Transporte e Terestres Distritu Oé-Cusse, Vitór da Concenção Teme katak, sira simu ona ejizensia ne’e no haruka kedas ba polisia trafiku nia hodi halo operasaun ba kareta kamioneta ne’ebe tula pasajeirus.
“Ohin ami haruka kedas Polisis Unidade Trânzitu atu halo operasaun ba kondutor kamioneta ne’ebe ulun fatuk to’os hodi la kumpri regra ne’ebe iha,” dehan Diretor Teme.
Enkuantu kona ba kria terminal, Diretor ne’e dehan durante ne’e iha ona mini terminal iha Tono no Maumate.
