“Iha tinan kotuk bainhira projeitu remata atu halo pagamentu ba kompania sira, ami mak prepara cek no prepara relatoriu, no haruka sira ba foti sira nia osan iha konta bankaria, mais iha tinan ida ne’e oin seluk fali, ami la halo cek maibe fasilita deit prosesu administrative koloka ba dirasaun nasional,” kestiona Administrador Distritu Liquisa, Domingos D.C. dos Santos, foin lalais iha Distritu Liquisa.
Tuir nia, Governu local labele sukat sira nia kapasidade, kuandu buat hotu Governu sentral mak jere, “katak sira fo televizaun mai maibe remot sira mak kaer, ne’e la’os desentralizasaun.”
Entretantu Deputadu Francisco Branco husu, Governu tenke fo desentralizasaun ne’ebe maka masimu ba governu local, nune’e bele hatene los-los kapasidade ne’ebe maka distritu ida-idak iha.
“Iha momentu Governu mai defende Orsamentu Jeral do Estadu hodi hamosu projeitu PDD ne’e, ami kestiona buat barak , maibe sira nia esplikasaun mak atu fo kbi’it ba distritu sira hodi aban bairua la’o ba prosesu desentralizasaun, mais tanba saida maka hamosu fali prosesu ida hanesan ne’e,” preokupa Deputadu Branco.
Tuir nia, ho sistema ida ne’e, la’os ona ba oin maibe la’o ba fali kotuk, tanba ne’e kuandu governu iha planu tenke implementa ho diak mos.
