“Iha tinan ne’e ami tristi los, tanba ami nia animal hanesan manu, fahi, bibi, liu-liu karau barak maka mate tanba moras nakdedar ran sai husi inus, ibun, tilun no kidun e staf pekuariu nunka mai halo vasinasaun,” dehan Karau Nain Marcos Tob, iha Lifau, Oe-Cusse.
Atu moras ne’e labele daet ba animal sira seluk ne’ebe sei moris, karau nain sira buka meius hodi fo aimoruk tradisional hodi halo prevensaun.
“Ami uza ai tahan no ai kulit halo tratamentu ba animal sira ne’e, atu nune’e bele moris hodi fa’an fali buka osan hodi hola hahan no selu labarik sira nia osan eskola,” Karau Nain Tob katak.
Hatan ba kestaun ne’e Diretor Agrikultura e Peska Distritu Oé-Cusse, Jose Oki katak ida ne’e akontese tanba karau nain sira la fo informasaun ba staf pekuaria sira kona ba moras ne’e.
“Agora dadaun preparasaun aimoruk seidauk iha,” tenik Diretor ne’e.
