“Ami familia husi Vitima Masakre Metioan-Wedauberek husu ba Parlamentu Nasional atu tau agenda ona projeitu lei Reparasaun no Institutu da Memoria, nudar asaun konkretu atu dignifika vitima ba violasaun direitu umanus ne’ebe mosu durante tempu okupasaun Militar Indonesia,” eziji Porta voz Familias Vitima, Elidio Maria de Jesus, iha Konferensia Imprensa, (22/08), iha Salaun Yayasan Hak, Farol, Dili.
Masakre Metioan-Wedauberek mosu iha 27 Agostu tinan 1975, hodi kontra-golpe entre FRETILIN no Uniaun Demokratiku de Timor (UDT) ne’ebe hamate ema nain 11 iha masakre ne’e.
Tuir Porta voz de Jesus, intensaun eziji ne’e la’os atu hamosu odiu vigansa, maibe atu hametin liu tan espiritu Unidade Nasional iha ukun rasik a’an nian laran.
Entretantu Deputadu Pedro da Costa Martires rekonese, lei ne’e importante duni, e meja Parlamentu sei buka tempu hodi debate lei ne’e.
“Iha terseira legislature ne’e ami sei tau prioridade, loke fali lei ne’e atu hatama fali ba meja hodi halo diskusaun,” dehan Deputadu Martires.
Deputadu ne’e afirma, iha mandatu II lejislatura, lolos aprova tiha maibe adia fali tanba altura ne’eba iha problema kona ba lei veteranus nian.
