Maske nune’e tuir Engenheiro Estrada iha Sekretariu Estadu Obras Publiku (SEOP), Jose Agusto katak la presiza ona halo trotoar tanba estrada luan.
“Estrada nia luan ne’e la favoravel atu ita halo trotoar e normal trotoar nia luan ne’e 1,20 sentimetrus, maibe realidade agora ne’e lato’o virgula 20, entaun ami labele halo buat ida,” hateten Engenheiro Estrada, Jose Agusto, foin lalais, iha nia knar fatin iha Mandarin, Dili.
Estrada hirak ne’ebe la ho trotoar hanesan iha eskola 10 Dezembru nia oin, no iha fatin balun halo ema la’o ain liu-liu estudante sira des araska bainhira la’o iha estrada ninin.
“Agora ami tau hela grape ho tanda hasa’e hela, no ema sira ne’ebe maka la’o ain, bisikleta bele la’o deit ihafatin ne’e,” Enginering Estrada ne’e dehan.
Entretantu tuir Deputadu Inacio Moreira, ida ne’e akontese tanba governu laiha planu ne’ebe mak diak antes implementa projeitu ruma.
“Tenke halo estudus ida ne’ebe maka klean, hodi hatene katak estrada ne’ebe maka halo ne’e halo ho trotoar ga la’e, governu tenke hare,” kritika Deputadu ne’e.
Tuir nia, estrada iha eskola 10 Dezembru nia oin ne’e tenke halo trotoar, nune’e labele estudante sira ne’e bele la’o tuir trotoar no la risku ba sira nia vida.
“Ida ne’ebe la presiza trotoar,iha fali trotoar, e ida ne’ebe presiza trotoar laiha fali, hau la hatene labarik sira ne’e kuandu sai husi eskola ba hein kareta iha ne’ebe los no halo nusa,” preokupa Deputadu Moreira.
Tuir nia, hakarak ka lakohi tenke halo duni trotoar, nune’e ema sira ne’ebe maka la’o ain sira bele liu, no sente seguru, tanba iha Dili laran ne’e la’os ema hotu-hotu iha kareta ho motor.
