Violensia Domestika entre fen-la’en ne’e akontese iha 13 Marsu 2012, iha Aldeia Ailok laran, Suku Bairo-Pite, Distritu Dili, iha tuku 06:00 lokraik.
“Hau iha uma hela, derepenti nia mai fo hau osan tiga dolar deit, no nia mai ho kondisaun lanu. Ne’e maka hau husu nia o sai husi dader lori ho ai barak-barak maibe lori osan oituan hanesan ne’e deit ga, ne’ebe nia dehan hau : nonok, mais tanba hau nervozu hau koalia be-beik, ne’e duni nia sai ba liur foti ai tuda kona hau nia ibun to’o ran,” deklara Vitima DE, (22/08), iha Tribunal Distrital Dili (TDD).
Hafoin akontesementu ne’e, neste momentu familia husi vitima mai hare nia ibun ran hotu.
“Hau nia familia sira mai, no hare hau nakonu ho ran, no hau nia alin feto ba kesar tiha polisia no polisia mai foti nia” dehan Vitima ne’e.
Rezultadu husi akontesementu ne’e vitima hetan suku iha ibun pontu tolu no halo tratamentu saude durante semana ida iha Ospital Nasional Guido Valadares (HNGV).
Entretantu Arguidu FC iha nia deklarasaun rekonese katak, saida maka DE koalia ne’e los hotu.
“Hau lanu maka hau mai uma, to’o iha uma, seidauk tur foin fo osan ba nia, nia ibun-ibun mai hau, tanba hau lanu hela ne’e duni nervozu sa’e lalais, ne’e maka hau ba liur hetan ai ida no tuda kona nia,” deklara Arguidu FC ne’e.
Iha julgamentu ne’e Arguidu arepende ba nia hahalok ne’ebe maka nia halo ba vitima no arguidu promete sei la repete hahalok ne’e.
“Hau baku tiha, hau sadar oituan e hau husu deskulpa no ba hakneak iha ortoriu nia oin, no jura hau la halo tan hahalok hanesan ne’e,” promote Arguidu FC.
Julgamentu ne’e rasik diriji husi Juis Collectiva, Juis Prezidente Duarte Tilman, Yacinta Coreira, Antoninho Gonsalves, no Reprezentante Husi Ministeriu Publiku Prokurador Hipolito Santa, no Arguidu hetan defeza husi Advogadu Cancio Xavier.
Enkuantu hafoin rona tiha deklarasaun husi Vitima no Arguidu, Juis Prezidente deside Arguidu sei fila fali mai Tribunal iha dia 04 Setembru 2012 hodi rona rezultadu ikus.
