“Atu halo telemedicine ou telekonferensia ho medikus espesialista sira iha liur, ne’e hanesan ideias ida ne’ebe ami atu hato’o ba Ministerio Saúde para bele konsidera hodi diminui ita nia orsamentu ne’ebe hasai ba ita nia sistema referral, tanba pasiente balun moras isin manas deit mos haruka ba liur,” hateten Prezidente AMTL, Doutora Virna Maria Gusmão dos Reis Martins Sam hafoin Kongresu Nasional (AMTL), iha Bidau Toko Baru, Dili (17/08).
Tuir Doutora Virna, liu husi sistema telemedicine ne’e, mediku sira iha rai laran bele pasa uluk informasaun kona ba kondisaun pasiente ba mediku espesialista sira iha ospital ne’ebe atu transfere moras ne’e ba.
“Se sira hatan presiza lori emerjensia ba iha liur mak ba, se dehan la presiza, entaun halo deit tratamentu iha rai laran, tanba Timor mos iha ona mediku jeral barak inklui espesialista balun,” Doutora Virna tenik.
Iha lidun seluk Deputadu Mateus de Jesus, konkorda ho ideas ida ne’e maibe programa telekonferensia entre medikus, ne’e la’os foin mak trasa maibe uluk kedas bainhira governu Timor –Leste asina akordu ho governu Indonezia no Singapura atu bele simu pasiente ne’ebe medikus Timor labele ona fo atendementu.
“Hau hanoin komunikasaun importante tebes entre medikus sira bele komunika liu husi via internet no telefone un minute deit it abele koalia ho ema nasaun ne’ebe deit maibe durante ne’e hau hare atraza mak iha prosesu administrasaun,” dehan Deputadu ne’e.
