“Agora dadaun ita iha 38 viaturas mak ita iha, 10 at total ita labele hadia, restu ita fahe kada distritu ida ambulansia ida ka rua hodi suporta sira nia sistema referral iha baze tula moras maibe iha situasaun dificil diretor sira tenke kria koperasaun diak ho instituisaun seluk ne’ebe iha atu bele ajuda,” informa Diretora Nasional Ambulansia, Doutora Ana Maria Pereira Magno, foin lalais iha Bidau Toko Baru, Dili.
Enkuantu total orsamentu ne’e MS hasai hodi halo manutensaun ba kareta ambulansia sira ne’e kada fulan kuaze 20 to’o 30 pursentu.
Tuir nia, ambulansia ne’ebe at no labele halo manutensaun la’os Governu mak sosa maibe simu husi doador sira ho tipu oi-oin, no defisil atu hetan nia mesin bainhira at.
Relasiona ho problema ida ne’e, MS iha ona planu atu sosa tan kareta ambulansia 19 hodi suporta servisu Sentru Saude sira iha baze e agora iha faze tenderizasaun.
Entretantu tuir Membru Parlamentu Nasional, Deputada Ilda Maria da Conceição katak, ambulansia hirak ne’e labele halo manutensaun tanba sistema la diak.
Kareta ambulansia sira ne’e labele halo manutensaun tanba sistema halo manutensaun ba ambulansia mak ladiak kuaze fulan ida ka rua mak halo manutensaun entau kondisaun kareta ne’e nian sai at liu tan to’o labele resolve.
“Ami hetan informasaun dala ruma liu fulan ida mak foin halo manutensaun, tanba ne’e husu ministeriu atu toma atensaun hodi halo manutensaun rutina ba kareta ambulansia sira ne’e, nune’e bainhira halo sirkulasaun atende pasiente sira ho diak,” dehan Deputada ne’e.
