“Agora dadaun prepara hela atu fo kapasitasaun ba medikus foun hamutuk 15, ne’ebe sei halo graduasaun iha Novembru tinan ne’e, hasa’e sira nia konesementu klean kona ba moras ne’ebe iha nune’e sira labele hakfodak bainhira tun ba iha distritus fo atendimentu ba pasiente sira,” dehan Prezidente AMTL, Doutora Virna Maria Gusmão dos Reis Martins Sam, foin lalais iha Hospital Nasioanl iha Bidau Toko Baru, Dili.
Formasaun hasa’e kapasidade servisu Mediku sira ne’e rasik durante semana ida deit, tanba tenke aloka ona sira iha distritu sira, maibe ba future sira sei fasilita medikus (tantu foun ka tuan) atu tuir formasaun ho rutina kada semana.
Alende ne’e AMTL mos hala’o ona programa kapasitasaun regular iha rai laran no rai liur kona ba HIV/SIDA, e agora medikus balun sei tuir hela treinamentu kona ba tratamentu kazu HIV/SIDA iha Australia durante semana rua.
Medikus sira ne’e mos sei partisipa Kongresu Nasional HIV/SIDA iha ne’eba no sira sei halo monitorizasaun tinan ida dala rua.
La’os ne’e deit, kapasitasaun seluk mak kona ba susu been inan nian, no ba Mediku Espesialista sira mos sei hala’o sosializasaun guest line kona ba TBC, Malaria ba Medikus foun sira.
Iha parte seluk Membru Parlamentu Nasional, Deputada Ilda Maria da Conceição dehan, programa hasa’e kapasidade ne’e importante tebes ba medikus sira, maibe tenke espesifiku, labele jeral deit.
“Hau hanoin Ministerio Saúde tenke tau atensaun tanba agora dadaun ita iha medikus espesialista husi estranjeirus barak, e buka meus oinsa atu medikus sira ne’e bele transforma sira nia matenek ba mediku Timor oan sira tantu foun no tuan, nune’e bainhira kontratu hotu sira bele uza kapasidade ne’ebe sira iha hodi fo atendimentu ba pasiente sira,” dehan Deputada ne’e.
