“Iha fulan Julhu ami ba hare ponte iha Ermera atu baHatulia, ponte ne’e kondisaun grave los no bele dehan servisu emerjensia, tenke ser ditangani, ami ba foti dadus ami hatama tiha ona ba Diretor no Sekretariu Estadu tuan, maibe to’o agora seidauk iha tanggapan ruma,” dehan Xefe Ponte Diresaun Nasional, Abrao Vieira, (16/08), iha nia knar fatin Mandarin, Dili.
Tanba ne’e tuir nia, sira sei nafatin koko atu koalia ho Sekretariu Estadu foun, e espera katak bele tau hanesan programa prioridade ida.
“Karik agora ponte ne’e tohar tiha ona, ami seidauk ba hare,” dehan Diretor ne’e.
Entretantu Deputadu Francisco da Costa dehan, ne’e responsabilidade SEOP nian, e sira tenke tau atensaun ba kestaun ne’e.
“SEOP foun tenke atende problema ne’e, tanba ne’e maka nudar promesa ne’ebe maka partidu politika sira uza, tanba povu maka ita bele hetan kadeira ne’e duni presiza mos kria kondisaun ne’ebe maka diak ba sira,” dehan Deputadu da Costa.
Tuir nia, ne’e duni husu mos ba Dirasaun ponte atu bele kolia ho SEOP hodi toma atensaun hodi nune’e povu Ermera bele halo’o sira nia atividade ho diak.
“Ponte ho estrada ne’e importante be povu, la’o ba halo aktividade liu-liu ba inan aman sira nebe maka faan sasan, atu lori sira nia modo mai merkedu ne’e presiza kondisaun Estrada nebe maka diak, no kondiasaun povu nebe maka diak, ne’e Governu presiza hare no hanoin to’o iha ne’eba,” Deputadu ne’e tenik.
