Vitima dezastre naturais hamutuk 115 ne’ebe akontese iha Feveriru 2011 inklui vitima iha tinan 2009 ne’ebe sira nia uma ahi han motuk, rai halai, mota sobu sira nia uma, inundasaun no anin bo’ot iha Sub-distritu hat(4) iha Distritu Oe-Cusse, hetan ajudus material konstrusaun husi Ministeriu Solidaridade Sosial (MSS).
Tuir Kordenador Dezastre Naturais Distritu Oe-Cusse, Cornelio da Crus katak ajudus hirak ne’e tuir duni kriteriu ne’ebe Ministeriu determina ona.
“Hare liu husi estragus ne’ebe iha hanesan estragus total, estragus naton no estragus kma’an. E tuir dadus ne’ebe iha, iha uma kain 63 maka seidauk bele hetan osan maun de obra no ai kuadradu, tanba Governu foin maka forma, espera katak semana iin ou fulan oin bele iha alokasaun ona,” hateten Kordenador Dezastre Naturais, da Crus, (13/08), hafoin fahe material konstrusaun ba vitima sira, iha Sede MSS Distritu Oe-Cusse.
Entretantu Xefe Departementu Apoiu Emerjensia Nacional iha MSS, Vidal da Costa husu ba vitima sira ne’ebe simu ona ajudus hirak ne’e, atu labele halo tan uma iha fatin ne’ebe risku ba dezastre.
“Governu sei la fo tan ajuda kuandu imi kontinua halo uma iha fatin ne’ebe risku akontese dezastre naturais, halo uma iha fatin ne’ebe do’ok husi dezastre,” dehan Xefe Departementu ne’e.
Enkuantu Benefiasiariu husi Suku Laok Foan, Alarico Nufa no Xisto Manca sente kontente ho ajudus ne’e, maibe triste tanba tenke hasai tan osan $50, hodi tula ajudus hirak ne’e to’o iha sira nia knua.
“Maibe ami fo agradese ba Governo Timor Leste, tanba maske prosesu ne’ebe kleur maibe ohin loron ajudus ne’e to’o duni iha ami nia liman, agora ami hasai tan $50 hodi tula material sira ne’e ba to’o ami nia aldeia,” hateten Benefisiariu nain rua ne’e.
Benefisiariu sira ne’e mos ejiji ba Membru Parlamentu III lejislatura no V Governu Konstitusional, atu aselera prosesu diskusaun ba esbosu lei kona ba Estatutu Autonomia Espesial ba Distritu Oe-Cusse ne’ebe sei pendent hela.
