Krime Violensia Domestika (VD) husi loron ba loron kontinua akontese no numeru ba kazu aumenta ba bei-beik iha rai laran, hanesan akontese iha Suku Lifau iha Distritu Oe-Cusse ne’ebe sei okupa numeru um (1) kompara ho Suku sira seluk iha Distritu ne’e.
“Husi suku sanulu resin walu ne’ebe maka ejisti iha Oe-Cusse, Suku Lifau maka hetan numeru um ba kazu violensia domestika , as liu,” hateten Kordenadora Unidade Justisa ba Feto iha Judicial System Monitoring Program (JSMP), Floriano Soriano Menezes, hafoin halo observasaun ba kazu VD iha Distritu Oe-Cusse, (13/08), iha Oe-Cusse.
Ho realidade ida ne’e, JSMP liu husi WJU identifika feto foinsa’e nain 20 iha suku ne’e hodi tuir treinamentu hasa’e sira nia konesementu iha area direitus umanus, kona ba Violensia Bazea ba Jeneru, Kodigu Prosesu Penal no Kodigu Penal.
“Hafoin tuir treinamentu ne’e, partisipante sira bele ajuda vitima Violensia Bazea ba Jeneru hodi prosesa tuir lei formal,” Kordenadora WJU ne’e esperansa.
Enkuantu Partisipante Adriana Caet, senti kontente ho treinamentu loron rua ne’ebe organiza husi JSMP, tanba ajuda ona sira hodi hatene saida Lei VD no oinsa prosesa autor VD tuir prosesu formal.
