“Ami hili distritu Liquisa, tanba iha estudu lubuk ida no peskiza lubuk ida ne’ebe maka hatudu violensia domestika ne’e maioria akontese iha distritu Liquisa, rezultadu ida ne’e ami hetan liu husi monitorizasaun ne’ebe maka ami halo iha tribunal 4 iha Timor –Leste,” dehan Diretor Ezekutivu JSMP, Luis Oliveira Sampaio, (17/08), iha Liquisa.
Tuir nia, JSMP organiza programa ho titlu ‘Tinan Rua Implementasaun Lei Violensia Domestika’ iha Liquisa, ho objetivu atu hatene sa dezafiu maka Lider Komunitaria no Polisia sira infrenta kona ba implementasaun Lei ne’e.
Entretantu Komandante Unidade Polisia ba ema Vulneravel (VPU) Isaura M. dos Santos hateten,dezafiu barak mak sira infrenta bainhira implementa lei VD ne’e.
“Ami laiha orsamentu atu halo sosializasaun lei violensia domestika iha area rurais iha distritu Liquisa, tanba iha komunidade barak mak seidauk iha konesementu ba lei ne’e, e VPU rasik laiha fatin ba Vitima sira atu toba, no hahan ba sira, tanba vitima sira ne’ebe maka mai ne’e kuaze husi area remotas,” hateten Komandante VPU Distritu Liquisa ne’e.
Iha biban hanesan Xefe Suku Distritu Liquisa, Agusto Vidigal rekonese katak kazu VD barak duni e atendementu polisia ba Vitima sira mos durante ne’e la’o ho diak.
“Ami iha kolaborasaun diak entre lider komunitaria no polisia, ami ladun iha difikuldade, so ke ami husu ba Governu atu bele habelar liu tan informasaun kona ba lei ne’e tanba ita nia komunidade barak mak seidauk iha konesementu ba lei ne’e,” sujere Xefe Suku Distritu Liquisa ne’e.
