“Ami deside fo osan ba Casa Vida tanba ami hatene no fiar katak Casa Vida mak organizasaun importante iha Timor-Leste no hau hakarak iha lokraik ida ne’e husu ba imi hotu ne’ebe iha ne’e, iha hanoin atu fo supporta finanseiru ba Casa Vida,” dehan Reprezentante TLPDP, Melita Zielonko, (15/08) iha Kafe Aroma Bidau, Dili.
Iha parte seluk Diretora Casa Vida, Simone Barbosa de Assis hateten kada tinan sira simu apoiu husi governu Timor-Leste liu husi Ministeriu Solidaridade Sosial (MSS) maibe ki’ik liu, enkuantu iha programa barak mak atu dezenvolve ba labarik (vitima) sira.
“Dala barak ema hare Casa Vida nia programa barak liu, iha labarik kursu komputador , suku entau ema hanoin Casa Vida la presiza supporta tan maibe tuir lolos Casa Vida loron ba loron presiza supporta tan liu-liu governu Timor-Leste, ami presiza governu tau matan diak liu tan ba ami tanba ami parseirus governu laiha fatin seguru ba labarik nune’e ami halo servisu ida diak,” Diretora Assis tenik.
Nia informa, ba tinan ne’e sira simu apoiu husi governu ho montante $4.000, nune’e mos husi organizasoens internasional hanesan UNFPA no parseiru sira seluk.
Iha fatin hanesan Xefe Departementu Protesaun ba Labarik iha Ministeriu Solidaridade Sosial (MSS), Florencio Gonzaga dehan, governu mesak ho rekursu umanu ne’ebe limitadu labele halo buat barak.
“Desde Casa Vida harii MSS iha ona koperasaun ne’ebe diak ho sira, MSS kontinua fo supporta ba programa ne’ebe Casa Vida iha maske oituan maibe pronto nafatin fo apoiu to’o agora, e hau espera katak ho abilidade ne’ebe vitima sira iha bele fo benefisiu ba sira iha futuru,” Xefe Gonzaga esperansa.
