Formasaun vokasional ne’e mak hanesan Suku, Tein, Artezenatu, Alfabetizasaun no Komputador tanba Casa Vida mak fatin ba sira atu espresa no promove kreatividade no talent ne’ebe sira iha hodi kontribui ba prosesu dezenvolvimentu.
“Ohin ami fahe sertifikadu ba labarik feto nain 41 tanba sira konsege remata kursu suku, tein, artezenatu no grupu defisiente husi Assert kompleta kursu komputador, ami kontente tebes e ida ne’e hanesan mehi ida sai realidade, sira bele hetan oportunidade no ho kapasidade ne’ebe sira iha sira bele hetan servisu,” dehan Diretora Casa Vida, Simone Barbosa de Assis, (15/08), iha Aroma Kafe Bidau, Dili.
Diretora ne’e haktuir, durante tinan hat nia laran Casa Vida mos fo atendimentu ba labarik feto vitima husi violensia seksual, violensia domestika, abuzu seksual husi 13 distritus hamutuk 160, iha Uma Mahon liu-liu distritu Liquisa, Baucau, no distritu Manufahi.
Labarik vitima hirak ne’e durante iha Uma Mahon sira mos hetan kapasitasaun hodi dezenvolve sira nia abilidade no programa analfabetizasaun inklui akompahnamentu terapia psikolojia no mediku.
Casa Vida mos iha projeitu ida hanaran Kafe Aroma ne’ebe hodi promove abilidade no kreatividade vitima sira nian hodi hetan rendimentu, atu suporta fali ba iha programa Casa Vida nian.
“Hau espera Casa Vida la halo servisu deit kona ba centru ba labarik maibe servisu hamutuk ho komunidade liu –liu familia sira atu bele hamenus problema violensia domestika no abuzu seksual iha uma laran, tanba la’os buat diak ba ita simu labarik vitima lor-loron iha centru ne’e,” Diretora ne’e esperansa.
Entretantu Graduadu Defisiente ho inisial MDC ne’ebe mos sai vitima ba VBJ, sente kontente ho formasaun ne’ebe nia hetan iha CV, e espera katak iha futuru bele hetan servisu hanesan mos ho sira seluk ne’ebe normal.
“Hau kontente tebes bainhira hetan esperiensia suku, tein no artezenatu husi formadores sira husi Portugal, Brazil no Australia tanba ho sira nia dedikasaun mak ami bele iha esperansa hodi aprende buat ruma ba ami nia futuru,” dehan MDC ho kontente hafoin simu sertifikadu.
Enkuantu iha serimonia fahe sertifikadu ne’e marka prezensa hosi Reprezentante Ministeriu Solidaridade Sosial (MSS), Florencio Gonzaga, Parseiru Internasionais no Nasional inklui mos konvidadus seluk.
