Conselhu Nasional Joventude Timor-Leste (CNJTL) sei estabelese Unidade Observador ida hodi halo observasaun ba atividade hotu ne’ebe membru Parlamentu sira halo iha Uma Fukun PN.
“Ami hare to’ok, grasas Deus buat hotu la’o diak fulan Agostus ba oin ami bele ativu ona halo observasaun ba membru parlamentu sira kona ba disiplina oras no oinsa rezultadu vizita membru parlamentu ba estranjeirus, keta buka pasiar deit , gasta osan hira no prosesu tenderizasaun iha parlamentu laran ita buka atu kontrola baut ki’ik sira ne’e nune’e atividade iha parlamentu la’o ho transparan,” hateten Prezidente CNJTL, Leovigildo Hornai, (13/08), iha nia knar fatin Farol, Dili.
Unidade Observador ne’e kompostu husi Xefe Unidade, Ekipa Teknika no membru hamutuk na’in 6, maske ekipa ne’e ki’ik maibe espera katak sira nia servisu la’o ho susesu.
Tuir nia, joventude sira sei hakilar nafatin ba interese nasional ,sira sei la nonok bainhira Membru Parlamentu no Governu repete tan hahalok sira ne’ebe membru sira uluk halo. “Dader tama asina tiha, lokraik lakon husik mamuk fórum.”
La’os deit Parlamentu, maibe Unidade ne’e mos sei halo observasaun ba boa governasaun no anti korupsaun, observa ba grupu engenaria, liu-liu projeitu bo’ot governu nian iha kapital Dili, halo advokasia jeral kona ba halo levantamentu ba asuntu ne’ebe relasiona ho problema joven hanesan dezempregu, no moras inklui unidade arte kultura hodi promove kreatividade no talenta foinsa’e sira nian.
Entretantu Deputada Jacinta Pereira Abucau hateten, ne’e inisiativa ne’ebe diak no pozitivu hodi halo observasaun ba servisu deputadus sira nian iha parlamentu.
“Ita tenke rekonese buat ne’ebe ita halo la diak, ita presiza rona ita nia sosiedade sivil no jerasaun foun sira nia ideas atu hadia buat ne’ebe salah tanba jerasaun foun mak sei kontinua kaer nasaun ida ne’e, ita tenke sai mos lalenok ba sira,” dehan Deputada Abucau.
Enkuantu Deputada Ilda Maria da Conceicão mos konkorda foinsa’e sira atu halo monitorizasaun ba atividade PN, nune’e bele garantia buat hotu la’o ho transparansia.
