Atu garantia kualidade no prestasaun servisu ne’ebe diak hodi atende foinsa’e Timor oan sira, Conselhu Nasional Joventude Timor-Leste (CNJTL) kapasita ba nia staf sira ho formasaun kapasidade , nune’e sira ne’e bele promove joventude sira iha setor hotu.
“Formasaun lingua Ingles, komputador no abilidade seluk ba ami nia membrus sira, nune’e sir abele dezempenha sira nia funsaun ho diak, e ami mos halo ona akordu ho Timor Telekom hodi loke Sentru Internet Komunitaria ba foinsa’e sira,” hateten Prezidente CNJTL, Leovigildo Hornai, (13/08), iha nia knar fatin Farol, Dili.
CNJTL sei koalia ho Sekretariu Estadu Joventude e Desportu (SEJD), atu nafatin kolabaora ho organizasaun internasionais sira ne’ebe durante ne’e fo apoiu ba centru formasaun sira hotu iha rai laran atu nafatin fo apoiu nune’e bele kapasita joven sira ho kualidade.
“CNJTL sei laiha programa kapasitasaun ba foinsa’e sira, so iha deit Sentru Internet Komunitaria e liu husi ne’e sira bele fasilita aan liu husi informasaun ne’ebe iha hanesan prevensaun ba moras HIV/SIDA, problema joven, kenakalan remaja no seluk tan,” Prezidente CNJTL ne’e tenik.
Iha CNJTL iha mos divizaun arte kultura ne’ebe tau matan no promove talentu, kreatividade foinsa’e sira nian iha setor oi-oin, tanba ne’e husu ba foinsa’e sira atu labele kaben sedu.
Iha parte seluk Membru CNJTL ne’ebe lakohi publika nia identidade, sira sente kontente involve an iha membru CNJTL maske ho voluntario, maibe nudar joventude sira prontu fo kontribuisaun ba prosesu dezenvolvimentu no garantia estabilidade no paz iha pais ida ne’e.
“Ami iha ne’e iha programa kapasitasaun hanesan kursu lingua Ingles, ba kolega universitario sira hotu ne’ebe hakarak mai iha ne’e, hahu Segunda to’o Sesta-feira ,” dehan Membru CNJTL ne’e.
