Parlamentu Nasional sei kria Lei Internu atu kesi Deputadu sira atu sira ida-idak bele hala’o sira nia knar ho lolos nudar reprezentante povu iha Parlamentu.
“Karik segunda lejislatura ne’e kolega barak mak ladun iha pontualidade hala’o sira nia knar iha plenaria ka iha komisaun, hau senti ida ne’e lisaun ida ba ami, atu iha terseira lejislatura ne’e bele muda hotu hahalok sira ne’e,” hateten Deputadu husi Bankada Congresu Nasional Rekonstrusaun Timor-Leste (CNRT), Mateus de Jesus, (09/08), iha Parlamento Nasional, Dili.
Tuir nia, iha reuniaun bankadas deputadus sira sempre fo hanoin ba malu, atu esperiensia iha segundu lejislatura labele akontese tan iha terseira lejislatura ne’e.
Enkuantu tuir Deputadu husi Bankada Partidu Demokratiku (PD), Adriano Joao, katak, iha reuniaun lider bankadas, sira deside atu halo rejimentu internu etika mandatu Deputadu sira nian.
“Iha rejimentu internu ne’e Deputadu sira komesa tama servisu tuku sia to’o tuku neen lokraik,” hateten Deputadu Joao.
Nia hatutan, iha terseira lejislatura ne’e meza Parlamentu sei implementa lolos rejimentu ne’e, “sekarik deputadu ida falta, la tuir plenaria dala lima tu-tuir malu bele lakon nia mandatu,” Deputadu Joao tenik.
Nia hateten,asuntu ne’e sei debate tan iha plenaria parlamentu, nune’e bele hetan nia legalidade.
Iha fatin hanesan Deputadu Domingos Carvalho Araujo hateten, nudar reprezentante povu iha Uma Fukun, Deputadu sira iha dever atu ativa no disiplina (hatais formal), hahu Segunda to’o Sesta-feira.
“Iha ne’e ami simu orientasaun kuandu tama iha ne’e tuku sia lolos asina ona lista prezensa, mais realidade ami sira foun balu-balun mak mosu ona mai preense ona lista mais sira tuan to’o agora la mosu,” Deputadu foun ne’e preokupa.
