Planu atu sosa kareta ba Deputadus 65 ba Lejislatura ba dala tolu (III) nian, oras ne’e dadaun sei iha prosesu Administrasaun Parlamentu nia liman.
“Hau la lembra orsamentu montante hira mais aprovasaun orsamentu aloka ona ba 65 karros ba deputadu terseira lejislatura ninian,” hateten Vise Prezidenti Parlamentu, Deputadu Aderito Hugo (10/08) iha Parlamento Nasional, Dili.
Tuir nia, orsamentu ba kareta 65 ne’e mai husi Orsamentu Jeral do Estadu (OJE) 2012 nian.
Entretantu Deputadu husi Bankada Partidu Demokratiku (PD), Virgilio da Costa Hornai katak, transportes ba Deputadu sira importante tebes, tanba bele fasilita sira hodi hala’o sira nia knar ho diak.
“Liu-liu ba ezekusaun orsamentu do estadu ne’ebe hala’o iha terenu atu hare nia kualidade, Deputadu sira tenke halo fiskalizasaun diak, desloka ba distritu, subdistritu, sukus inklui aldeia,” Deputadu Hornai tenik.
Tuir nia, Deputadu la’os tur deit iha Parlamentu to’o nia mandato remata maibe sira tenke tun ba baze hodi hasoru malu ho povu hodi diskuti kona ba problema ne’ebe sira infrenta.
“Saida mak sira nia problema, saida mak ita bele rona hodi artikula transforma sira nia hanoin mai iha plenaria depois hato’o ba iha Governu, para Governu kompetente tau konsiderasaun ba iha sira nia problema ne’e,” Deputadu PD ne’e katak.
