Atu komunidade sira iha area rurais bele iha konesementu no hatene informasaun kona ba setor justisa nian iha Timor-Leste, Ministeriu Justisa (MJ) sei uza Radio Komunidade sira hodi transforma informasaun, liu-liu kona ba lei sira ne’ebe vigora iha nasaun ne’e.
“Ami sei servisu hamutuk ho Radio Komunidade sira iha 13 distritus, hodi desimina informasaun ba komunidade sira area rurais,” hateten Ministru Justisa, Dionisio Babo Soares, foin lalais iha Dili.
Alende ne’e Ministeriu mos sei halo sorumutu ho Xefe Suku no Xefe Aldeia sira inklui komunidade sira, atu sira iha konesementu kona ba lei sira no seluk tan.
Entretantu Deputadu David Dias Ximenes, hateten ne’e inisiativa ne’ebe diak ho nune’e komunidade sira iha area rural sira bele hatene informasaun kona ba justisa nian.
“Halo desiminasaun ba lei sira ne’ebe iha, e ne’e programa ne’ebe pozitivu tebes,” apoia Deputadu Mandati.
Tuir nia, komunidade sira tenke hatene lei sira ne’ebe vigor iha nasaun ida ne’e, saida mak sira nia direitu no dever.
